Van olds her bint der by ons in Tweante de witte wyve. Dæt bint eyn soort heksen, dey in kulen in de buesche en tuschen de buelten leavt. Sey seyt der ut as witte, lange, duenne fraulue, met lange, witte höre. As met alle heksen, sint der by de wive ok goden en kwåden der by. Mangs kön y der pleseer met hebben, mangs helpet se u, mear mangs schaad se u ok wal. Et is mear net, wur at se de kop stån hebt.

As y et helemål wilt verdryten by hör, dan muet y ´s nachens langs hör kule jagen en der 'n spit in smyten en hör to ropen dæt se der et gebråd mear by muetten seyn de krygen. As y dan hört van "woch y mear mål eaven tot as ik den eynen schoon to hebbe knuept en den anderen to hebbe ruekt, dan söl y et gebråd weasen!", dan muet y ok maken as y fort komt. Sey sölt u dreks nå kommen en at se u in de kragen vatt, stækt se u self an et spit!

Dæt hev der mål eyne dån, dår köjert de lue noch alt åver. Der sol 'ne bruelfte kommen, mear de va van de bruud wol eerst weten wur of sinnen dochter's vryer van maakt was. So hev hey uem frågen uem in et middelen van den nach langs de witte wyve te jagen met 'n peard en der eyn yseren spit in te smyten en hör te seggen dæt sey et gebråd mear soyken gån mosten. Den kearl wol gearne trauen en gueng des nachens hen.

De mood in de sökken natuyrlik, de wyve sint nich uem met te spotten, dæt bint geyn kleine wichter! Mear, hey smeet er spit in de kule en wenschen hör et gebråd to en dan maken hey at hey wyr op hus an köm, so rap et peard lopen wol. Dår gueng et hen, de wyve achter uem an, onmuendig hellig as dey warren, uem at se 'n kaal spit kregen harren.

Nu loopt dey wyvkes bannig rap, dues met at hey so heanig an op hus an köm, satten sey kats op de konte van et peard. Met at den vryer by hus köm, vloyg ey de delle op en deden se de duyren to. De wyve harren uem et spit noch nå smetten, mear dæt bleev stekken in de duyrstyle. Et gat dår van kan man huyt noch seyn.

Good doon kan man ok wal by de wyve. Mangs komt sey wal uem eynen doden balkenhasen frågen, uem te bråden. As y hör den geevt dan, dan kan et weasen at des anderen dagens u wårk al dån is. Kaarnemelk, beer, pannekoke en pap luest se ok wal. Dæt sett de buren vake op hör land, in de hoppe dæt de wyvkes hör helpen komt des nachens en sey des morns hör wårk klår hebt.

Ok reisigers dey moy bint, helpet se. As y moy bint en y denkt at der witte wyve in u nåberschop bint, dan muet y seggen "helpet my wyvkes, at et u good gån mag." Dan kan et luek weasen at der 'n pår ut de buesche komt, u tuschen hör in nemt en fuyr et hus dale sett. Mangs maakt sey u ok wal snikkerig wat ofhandig, mear dæt is nuemmer mear as wat y könt missen.